Қазақстанда дайындалатын донорлық қан көлемі медициналық ұйымдарға 100 пайыз жеткілікті. Бұл туралы Дүниежүзілік қан доноры күніне арналған брифингте ДСМ өкілдері айтты,- деп хабарлайды El.kz.

Донорлық қан құю акушерлік сала, онкогемотология, хирургия және травмотологияда көп қолданылады. Бұл үдерісті іске асыруға 300 - ден астам дәрігер мен 700 медбике, еліміздің стационарларында 500-ден астам дәрігер тартылған. Нәтижесінде Қазақстанда жыл сайын 200 мың литр қан жиналады және өңделеді.

– Елімізде қан құю саласымен айналысатын 470 медициналық ұйым бар. Жыл сайын 80 мыңнан астам науқас қан компоненттерін алады, - деді ҚР ДСМ өкілі Батырхан Сарымсақов.

Статистика бойынша әрбір үшінші адам өз өмірінде донорлық қанға мұқтаж. Бүгінде дені сау кез келген кәмелет жасындағы ҚР азаматы донор бола алады.

– Қазақстанда жыл сайын пациенттерге 400 000-нан астам доза немесе күніне 1 мыңнан астам доза қан құйылады. Ол үшін қан орталықтарына күн сайын мыңдаған ерікті келеді. Донорлардың ішінде 68 пайыз ер адамдар болса, 32 пайызды әйелдер құрайды, - деді «Трансфузиология ғылыми-өндірістік орталығы» басқарма төрағасының орынбасары Дулат Имашбаев.

Айта кетейік, Қазақстанда 100-ден аса құрметті донор тұрады.

Ақпаратты әзірлеген Бақытнұр Шерікбай