Х.Досмұхамедов атындағы Атырау университетінде қазақстандық жоғары оқу орындарының ауқымды көрмесі өтіп жатыр. Көрмеден қажетті ақпарат алуға алғашқы күні 2000-ға жуық талапкер келді, деп хабарлайды El.kz ақпарат агенттігі.
Ғылым және жоғары білім министрлігінің мәліметінше, көрменің мақсаты – Қасым-Жомарт Тоқаевтың тапсырмасы бойынша Атырау облысының жастарына бөлінген нысаналы білім гранттары жайлы ақпарат беру.
Атырау өңіріне 1200 білім гранты бөлінген. Биыл мамандықтардың көлемі кеңейіп, білім гранттары 9 бағытты қамтып отыр. Атырау өңірінің түлектері үшін мамандық таңдаудың мүмкіндіктері көбейді. Бұл көрмеден талапкерлер мамандықты қалай таңдау керек екені жайлы да біле алады. Әрбір жоғарғы оқу орны туралы толыққанды мәлімет беріледі, - деді министрдің кеңесшісі Руслан Емелбаев.
Биыл ҚР Ғылым және жоғары білім министрлігі батыс, халық тығыз қоныстанған және жаңадан құрылған өңірлердің талапкерлері үшін 5000 грант бөлініп отыр. Атырауда өткен көрмеде «Грант түрлері және талапкердің жол картасы» тақырыбындағы кәсіби бағдар беру семинары да өтті. Онда білікті мамандар талапкерлерге мамандықты сәтті таңдаудың жолын көрсетіп, нарықтағы сұранысқа ие салалар туралы кеңес берді. Ұйымдастырушылар Ұлттық бірыңғай тестілеуде 125 баллдан жоғары ұпай жинаған түлектерге сыйлықтар табыстады.