Астананың триатлон паркінде «Run for autism» қайырымдылық жүгіру жарысы жоғары деңгейде ұйымдастырылды, деп хабарлайды El.kz ақпараттық агенттігі.
Жыл сайын сәуір айы бойы аутизм спектрі бұзылған адамдарға көмектесу үшін бірқатар шаралар мен ақпараттық-түсіндіру науқандары өткізіліп тұрады. Соның ішінде бүгінгі қайырымдылық жүгіру жарысы да бар.
Жүгіріс 1, 2,5, 5 және 10 шақырым қашықтықтары бойынша өтіп жатыр. Оны ішінде 10 км – 282 адам, 5 км – 324 адам, 2,5 км – 171 адам және 1 км – 163 адам қатысты.
«Болашақ» қорының қамқоршылық кеңесінің төрайымы Динара Гапланның айтуынша, аталған ауқымды шара осындай мақсатта алғаш рет ұйымдастырылып отыр.
«Бұл жүгіріс арқылы біз аутизм бар ересектер мен балалардың мәселелеріне барынша көңіл аудартқымыз келді. Жүгіріске көп адам қатысып жатыр. Қуанып отырмыз. Бұл бастаманы елорда әкімдігі қолдағанына өте ризамын. Бірлескен жұмыстың нәтижесі деп санаймын. Бізбен бірге жүгірген әр қатысушыға алғыс айтамын. Жүгіріс жыл сайын өтетін шараға айналады деген үміттемін», – деді «Болашақ» қорының қамқоршылық кеңесінің төрайымы Динара Гаплан.
Іс-шара барысында аутизм және дамуында басқа да ерекшеліктері бар балалар үшін «Көңілді старттар» ойын-сауық эстафетасы ұйымдастырылды. Командалық ойындарға 5 пен 14 жас аралығындағы аутизм және басқа да синдромы бар 100-ден астам бүлдіршін қатысты.
Жарысқа қатысушыларға медальдар мен бағалы сыйлықтар табыс етілді.