Коммуналдық қызметтер тәулік бойы күшейтілген режимде жұмыс істеуде. 13 қаңтарда күндізгі ауысымда қар тазалауға 1400-ден астам арнайы техника мен 2400-ден астам жол жұмысшысы жұмылдырылды, деп хабарлайды El.kz ақпарат агенттігі.
12 қаңтардан 13 қаңтарға қараған түні қаладан 2488 ауыр жүк рейсімен 34 мың текше метр қар шығарылды. Қыс мезгілі басталғалы қаладан 3 миллион текше метрден астам қар шығарылды, бұл 240 465-тен астам рейсті құрады. Ең алдымен, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар тазартылады.
Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие. Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған. Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.