Роза Бағланова атындағы «Қазақконцерт» мемлекеттік академиялық концерттік ұйымының үлкен залында композитор Нұрғиса Тілендиевтің 100 жылдығына орай «Отырар сазы шақырады» концерті өтеді, деп хабарлайды El.kz ақпарат агенттігі.
«Қазақконцерт» МАКҰ мәліметінше, сахна төрінде Қазақстанның көрнекті оркестрлері өнер көрсетеді: Алматы қаласынан «Отырар сазы» мен Н.Тілендиев атындағы академиялық фольклорлық-этнографиялық оркестрі және Астана қаласынан Еркеғали Рахмадиев атындағы мемлекеттік академиялық филармониясының симфониялық оркестрі.
Елорда тұрғындары мен қонақтары екі оркестрдің және халықаралық байқаулардың лауреаты Е. Рахмадиев атындағы мемлекеттік академиялық филармониясының Камералық хорының орындауында Нұрғиса Тілендиевтің қазақ музыкасының алтын қорына енген шығармаларын тыңдайды. Сондай-ақ көрермендерге ерекше шығармашылық эксперимент ұсынылады: көне қазақ халық аспаптарының үнімен қатар, «Vivo per lei», «The Prayer», «Melodramma», «Remember», «She» және «Шиндлер тізімі» фильмінен композициялар орындалады, - делінген мәліметте.
Сахнада елімізге танымал өнер иелері өнер көрсетеді. ҚР еңбек сіңірген қайраткерлері Светлана Айтбаева мен Азамат Жылтыркөзов, халықаралық және республикалық байқаулардың лауреаттары Нұрғалым Аманбай, Фархат Кубиев, Толғанай Пазылақын, Ербол Тәжібаев. Сонымен қатар, дәстүрлі ән өнер иесі Өзгеріс Шерікбай , халықаралық байқаулардың лауреаты Фируза Рахметова көрермендерге өз өнерін ұсынады.
«Отырар сазы шақырады» концертінің дирижерлері:
Н. Тілендиев атындағы АФЭО «Отырар сазының» көркемдік жетекшісі және бас дирижері – ҚР еңбек сіңірген қайраткері, «Құрмет» және «Парасат» ордендерінің иегері Дінзухра Тілендиева;
Н. Тілендиев атындағы АФЭО «Отырар сазы» оркестрінің дирижері – ҚР еңбек сіңірген әртісі, «Құрмет» орденінің иегері Жалғасбек Бегендіков.
Симфониялық оркестрдің дирижері – «Құрмет» орденінің иегері Арман Жайым.
Көркемдік жетекшілер:
Симфониялық оркестрдің көркемдік жетекшісі және бас дирижері – ҚР Халық әртісі, «Құрмет» орденінің иегері Абзал Мұхитдин;
Камералық хордың көркемдік жетекшісі және бас дирижері – ҚР еңбек сіңірген қайраткері Гүлмира Құттыбадамова.
Концерт 27 қараша күні сағат 19:00-де басталады.