Назарбаев Орталығында Қазақстан халқы Ассамблеясы, ҚР Президенті жанындағы Мемлекеттік басқару академиясының Орталық Азия өңіріндегі этносаралық және конфессияаралық қатынастарды зерттеу орталығы, «Eurasian Expert Council» ҚҚ және «Astana Success Building Group» Қазақстан Республикасының Тұңғыш Президенті – Елбасы Қорының қолдауымен ғалымдар мен сарапшылардың «Көпэтносты қоғам және заманауи мемлекет: даму стратегиялары» атты халықаралық форумы өтуде.
Іс-шараға Қазақстан халқы Ассамблеясы Төрағасының орынбасары – Хатшылық меңгерушісі Леонид Прокопенко, ҚР Парламенті Мәжілісі мен Сенатының депутаттары, ҚХА мүшелері, Ғылыми-сарапшылық кеңес пен этномәдени бірлестіктердің мүшелері, ҚРдағы БҰҰ, дипломатиялық корпустардың, халықаралық ұйымдардың, мемлекеттік органдардың өкілдері, өңірлік ҚХА ғылыми-сарапшылық топтары мен кафедраларының мүшелері, жоғары оқу орындарының өкілдері, қоғам қайраткерлері, ғылыми және шығармашылық зиялы қауым, үкіметтік емес ұйымдар мен БАҚ өкілдері қатысуда.
Форум аясында ғалымдар мен сарапшылар қазіргі заманғы жаһандық сын-қатерлер жағдайындағы Н. Назарбаевтың Қоғамдық келісім мен жалпыұлттық бірліктің қазақстандық моделінің рөлін талқылайды.
Панельдік сессиялар «Көпэтносты қоғамның ұлттық даму моделі: Қазақстандағы Өзбекстан жылы», «Астанаға 20 жыл: Еуразия жүрегінде», «Табысты әлеуметтік даму - көпэтносты қоғамды шоғырландыру негізі» тақырыптарында ұйымдастырылады.
Форум аясында Қазақстандағы Өзбекстан жылын өткізудің, сондай-ақ, Н. Назарбаевтың қоғамдық келісім мен жалпыұлттық бірліктің қазақстандық моделіне арналған ғылыми жобалардың республикалық конкурсының қорытындылары шығарылады.