Ақтөбеде жоғалған малшы төрт күннен соң табылды

Ақтөбе облысында мал іздеуге кетіп, қайтып оралмаған малшы 4 күннен көршілес облыстан табылды, деп хабарлайды El.kz ақпарат агенттігі.

Қостанай облысының құтқарушылары Ақтөбе облысының әріптестеріне көмек көрсетіп, жоғалған малшыны табысты іздестіруді аяқтады.

1985 ж.т. ер адамның жоғалғаны туралы хабарлама Ақтөбе облысының 112 кезекші пультіне 30 наурызда келіп түскен.  Ол Әйтеке би ауданының Жаңадәуір қыстағынан мал іздеуге кетіп, қайтып оралмаған. Ақтөбелік құтқарушылар Қостанай облысының шекара маңындағы ауданынан әріптестеріне көмек сұрады. Қостанай құтқарушылары бірлесіп Қамысты ауданы Оркаш ауылының маңынан жоғалған адамды тапты,-делінген ТЖМ мәліметінде.

Құтқарушылардың жедел әрекеттерінің арқасында ер адам аман-есен табылды. Ол  Ақтөбе облысына жеткізілді.