Ақтөбеде мейрамхана өртеніп, 40 адам эвакуацияланды

7 тамыз күні сағат 12:16-да 112 құтқару қызметіне Ақтөбе қаласы Астана ауданының Ағайынды Жұбановтар көшесінде орналасқан Alefun мейрамханасында өрт шыққаны туралы хабарлама түскен, деп хабарлайды El.kz ақпарат агенттігі.

№ 2 шақырту рангі жарияланды. Өртті сөндіруге 48 адам және 12 бірлік техника жұмылдырылды. Шақырту орнына барған кезде мейрамхананың шатыры өртеніп жатқаны анықталды, - делінген хабарламада.

Өрт сөндірушілер өрттің басқа ғимараттар мен үйлерге таралуына жол бермеді.

Мейрамхана жанында орналасқан балабақшадан 40 адам, оның ішінде 35 бала эвакуацияланған.

Өрттің аумағы 280 шаршы метрді құрады. Қайтыс болғандар мен зардап шеккендер жоқ. Өрт сағат 13:06-да сөндірілді. Өрттің шығу себебі анықталуда.

Ақтөбе облысы ТЖД өрт қауіпсіздік талаптарын қатаң сақтауға шақырады.