Ақтөбеде 119 рет жол ережесін бұзған жүргізуші жауапқа тартылды, деп хабарлайды El.kz ақпарат агенттігі.
Полиция қызметкерлері арнайы бағдарламалық кешеннің көмегімен 3 миллион теңге қарызы бар шетел мемлекетінде есепте тұрған Lexus автокөлігін анықтады.
“Қорғау” жүйесі арқылы анықталған азамат жол қозғалысы ережелерін тамыздың ортасынан бастап 119 рет бұзған. Жол ережесін бұзушы Ақтөбе қаласының 35 жастағы тұрғыны екені белгілі болды. Ол жылдамдық режимін асырған. Айыппұлдың жалпы сомасы 3 миллион 378 мың теңгені құрады.
Қазіргі уақытта көлік арнайы автотұраққа қойылды. Жолдардағы жауапсыз мінез-құлық көбінесе қайғылы оқиғаларға әкеледі. Жүргізушілер бұл туралы ойлануы керек.
Көптеген шетелдік көлік жүргізушілері жазадан құтыла алады деп үміттенеді, бірақ олай емес. Полиция қызметкерлері мұндай жүргізушілерді тауып, жауапкершілікке тартады.
Естеріңізге сала кетейік, облыс орталығының көшелерінде жол қозғалысы ережелерін бұзуды тіркейтін камералар орнатылған.
Жыл басынан бері камералардың көмегімен жылдамдық режимін асырудың 77 мыңнан астам фактісі тіркелді.