Anthropic, Google, OpenAI және xAI жасанды интеллект жобалары үшін АҚШ Қорғаныс министрлігінен 200 миллион долларға дейін қаржы алады, деп хабарлайды El.kz nbcnews-ке сілтеме жасап.

АҚШ Қорғаныс министрлігінің Цифрлық және жасанды интеллект жөніндегі Бас басқармасы бұл келісімшарттар ведомствоға «ұлттық қауіпсіздікке қатысты аса маңызды міндеттерді шешуге бағытталған озық ЖИ мүмкіндіктерін» жедел енгізуге мүмкіндік беретінін атап өтті.

Дүйсенбі күні АҚШ Қорғаныс министрлігі Anthropic, Google, OpenAI және Илон Масктың xAI компанияларына жасанды интеллектті дамытуға арналған жалпы сомасы 200 миллион долларға дейін жететін келісімшарттар берілетінін хабарлады. Компаниялар Қорғаныс министрлігінің бірнеше миссиялық бағыты бойынша ЖИ агенттерін әзірлеумен айналысады.

ЖИ-ді енгізу Қорғаныс министрлігінің әскерилерді қолдау және қарсыластарымыздан стратегиялық артықшылықты сақтау мүмкіндігін түбегейлі өзгертуде, — деді ведомствоның цифрлық және ЖИ жөніндегі бастығы Даг Мэтти ресми хабарламада.

Сондай-ақ дүйсенбі күні Илон Масктың xAI компаниясы «Grok for Government» жобасын жариялады. Бұл жоба — АҚШ үкіметтік құрылымдарына компанияның модельдерін пайдалануға мүмкіндік беретін өнімдер топтамасы. Компанияның X парақшасындағы мәліметке сәйкес, бұл өнімдерді федералды мекемелер, агенттіктер және департаменттер General Services Administration (GSA) тізімі арқылы сатып ала алады.

Бұған қоса, 2024 жылы OpenAI Қорғаныс министрлігінен құны 200 миллион доллар болатын бір жылдық келісімшартқа ие болған еді. Бұл келісімшарт OpenAI Anduril атты қорғаныс технологиялары стартапымен бірлесіп, «ұлттық қауіпсіздік миссиялары» үшін озық ЖИ жүйелерін өрістетуді жоспарлағаннан кейін берілген болатын.

Маусым айында OpenAI АҚШ-тың федералды, штаттық және жергілікті мемлекеттік қызметкерлеріне арналған арнайы «OpenAI for Government» бағдарламасын іске қосты.