Англияның футбол қауымдастығы 22 жастағы жартылай кәсіби «Hashtag United» клубының ойыншысы Раман Сидхудың қайтыс болғаны туралы қаралы хабарды жеткізді. Клубтың ресми мәліметінше, футболшының жүрегі тоқтап қалған, деп хабарлайды El.kz интернет порталы.

Қайғылы жағдай жас спортшы инклюзивті «Hashtag United» командасының сапында алаңға шығуға дайындалып жатқан сәтте болған. Куәгерлердің айтуынша, Сидху кенеттен өзін жайсыз сезініп, дереу дәрігерлердің көмегіне жүгінген.

Құтқарушылар Раманның өмірін сақтап қалу үшін екі сағаттан астам уақыт бойы күресті. Өкінішке қарай, ол небәрі 22 жасында көз жұмды. Біз марқұмның отбасы мен жақындарына, командасына және оны таныған барша жанға шын жүректен көңіл айтамыз, – делінген клубтың ресми мәлімдемесінде.

«Hashtag United» – әлеуметтік желілер арқылы танымал болған ерекше футбол жобасы. 2016 жылы танымал блогер Спенсер Оуэн құрған бұл команда бастапқыда әуесқойлар құрамасы ретінде өз жолын YouTube-та көрсетіп, көпшіліктің ықыласына ие болған. Қазір клуб инклюзивтілік пен әлеуметтік жауапкершілікке ерекше назар аударып, түрлі ерекшеліктері бар ойыншыларға мүмкіндік беріп келеді.

Клубтың негізін қалаушы Спенсер Оуэн жас футболшымен қоштасу рәсімін өзі басқарды. Әлеуметтік желілерде он мыңдаған жанкүйер Раманның отбасына қайғыра көңіл айтып, қолдау білдіріп жатыр.

«Hashtag United» клубы келесі ойынды Раман Сидхудың рухына арнайтынын мәлімдеді. Футболшылар алаңға қара лентамен шығып, командаластарының жарқын естелігін еске алады.