Алматы тұрғындары қаладағы жағымсыз түтін туралы шағымданғаннан кейін, Экология департаменті, санитарлық мамандар және Қазгидромет синоптиктері ауа сапасын бақылауға алды, деп хабарлайды El.kz интернет порталы.
Мамандар бірнеше нүктеде өлшеу жүргізді: АДК және “Москва” сауда орталықтары, Наманган көшесі, Абай даңғылы және Қарасай батыр көшелері. Алайда департаменттің ресми мәлімдемесі тұрғындардың шағымынан бірнеше сағаттан кейін, яғни жағымсыз иіс жоғалған соң жарияланды.
Қазгидрометтен Алматы мен облыста ауа сапасының аса жоғары ластануы туралы ресми ақпарат түспегені айтылды. Дегенмен сайттағы кестелер бойынша кейбір ластаушы заттар шекті мөлшерден асып кеткен.
Еске салсақ, Алматы әкімі бұған дейін қаладағы ауа сапасы 2028 жылға қарай екі есе таза болатынын айтқан болатын.