Алматы облысында саңырауқұлақ терушілер құтқарылды

2023 жылғы 12 тамызда үш баласы бар ана жол талғамайтын көлікпен Асы үстіртіне қарай саңырауқұлақ теруге кетіп, кешке қарай үйге оралмаған, деп хабарлайды El.kz ақпараттық агенттігі.

Телефоны өшірулі болған. Балалардың әжесі алаңдап, құтқарушыларға хабарласты. Кешке ТЖМ Республикалық жедел-құтқару жасағының жедел тобы отбасын іздеуге шықты.

Іздеу жұмыстары түні бойы жүргізіліп, бүгін таңғы сағат 10.00-де Асы үстіртінің оң жағындағы Түрген шатқалына қарай құтқарушылар саңырауқұлақ терушілерді тапты. Барлығы аман, ешкім медициналық көмекке мұқтаж емес. Олар ауа-райына байланысты кешке қарай щатқалдан түсе алмай, көлікте түнеу туралы шешім қабылдаған екен. Отбасы қауіпсіз жерге жеткізілді. Туристер құтқарушыларға алғыстарын білдірді. Жақындарыңызға әрқашан туристік бағытыңыз туралы ескертіңіздер! - делінген хабарламада.