Алматы облысында мемлекеттік активтерді тиімді басқару мақсатында бірқатар нысандар мемлекет меншігіне қайтарылды, деп хабарлайды El.kz ақпарат агенттігі.

Оның ішінде Ұшқоныр су шаруашылығы колледжі – инвестор келісімшарт бойынша 66,6 млн теңге инвестиция салмағандықтан, сот шешімімен мемлекетке өтіп отыр. Есік көлі бөгеті және 141,6 га жер учаскесі – 1,1 млрд теңге инвестиция тарту міндеттемесі орындалмағандықтан, нысан мемлекетке қайта берілді. Су тапшылығын шешу үшін 23 млрд теңге көлемінде инвестиция тарту жоспарланған. 

Қаскелеңдегі өнер мектебі – 2023 жылы келісімшарт жарамсыз деп танылып, Алматы экономикалық колледжі – инвестициялық міндеттемелер орындалмағандықтан ғимарат коммуналдық меншікке өткен жайы бар. 7 су шаруашылығы нысаны – келісімшарт талаптары сақталмағандықтан, жергілікті атқарушы органның бақылауына өтті.

Иесіз және апатты нысандар ретінде жалпы саны 967 ғимарат анықталып, 188-і мемлекет меншігіне қайтару рәсімінен өтіп жатыр.

Қаржы басқармасының мәліметінше, бірқатар ғимараттар бұзылып, кейбірі аукционға қойылады немесе қайта жаңғыртылады. Қазіргі уақытта 69 нысан инвестициялық жобаларға іріктеліп, 5 нысан бойынша серіктестер іздестірілуде.

Өткен жылы 397 313 гектарды қамтитын 1 340 жер телімі пайдаланылмай отырғаны анықталды. Мемлекеттік мүлікті тиімді басқару – жаңа инвестициялар тартуға, бюджетке қосымша табыс әкелуге және жұмыс орындарын ашуға мүмкіндік бермек.