Мәжіліс депутаты Ринат Зайытов жалпы отырыста әділет министрі Азамат Есқараевтан Әділетті Қазақстанды қашан орнататынын сұрады, деп хабарлайды El.kz ақпарат агенттігі.
Депутат өз сауалында Қылмыстық кодекстің 429-бабын мысалға алды.
429-бапта, өзіңіз білетіндей, «қоғамнан оқшаулауды қамтамасыз ететін мекеменің қызметкерімен және оның жақындарына, сондай-ақ сотталған адамдарға күш қолдану қатерін төндіру немесе олардың денсаулығына және өміріне қол сұғу» туралы айтылған. Бұл қалай? Сонда біз Қылмыстық кодекстің бір бабымен адамды соттап, ал екінші бабымен қорғап отырмыз. Бұл неге жол ашып отыр? Мекеме әкімшілігімен келісімге келіп, басқа сотталушыларға зорлық-зомбылық көрсетіп отырған фактілер жетерлік.
Осы орайда біз «сондай-ақ сотталған адамға қатысты» деген жерін алып тастауды сұрап отырмыз. Сіздің пікіріңізді білгім келеді, - деді мәжілісмен.
Сонымен қатар Ринат Зайытов азаматтарды еш себепсіз көшеден алып кетіп, қамайтын фактілер көбейгенін атап өтті.
Ішкі істер министрлігі, Бас прокуратура және Жоғарғы соттың өкілдеріне арналған біздің президенттің халыққа үміт берген «Әділетті Қазақстан» деген сөзі бар еді. Қазір Қазақстанда кез келген адамды көшеден алып, қамай салатын Ішкі істер министрлігі бар. Оған жоқ жерден айып тағатын прокуратура бар. Оған шешім шығара салатын сот бар. Осы орайда сұрақ: Әділетті Қазақстанды орнатуды қашанға жоспарлап отырсыздар? - деді Зайытов.
Әділет министрі Азамат Есқараев депутаттың пікірінің дұрыс екенін айтып, арнайы жұмыс тобында бұл мәселені талқылайтынын жеткізді.