Іс-шараны Л.Н.Гумилев атындағы ЕҰУ «Абай академиясы» ғылыми-зерттеу институты мен Қазақ әдебиеті кафедрасы ұйымдастырды.
Конференцияның басты мақсаты - Абайдың мұрасын зерттеу жұмыстарымен айналысатын абайтану орталықтары мен институттарының басын қосып, ақын мұрасына қатысты тың зерттеу жұмыстарын жасау, абайтанушы ғалымдардың соны еңбектерімен танысу. Абай мұрасын жаңаша пайыммен тануға бағдар беріп, ұлы ақын шығармашылығының еліміздің рухани даму тетіктерінің біріне айналып, абайтану саласында жаңа ізденістер жасауға жас ғалымдарды баулу – дейді ұйымдастырушылар.
Конференция модераторы «Абай академиясы» ҒЗИ директоры, ф.ғ.к., доцент Ж.Әубәкір шараға қатысушы қонақтарға алғысын білдіріп, мерекеге орай академия қызметкерлерін және конференцияға қатысушы ғалымдарды, еліміздің Абайтану орталықтарының басшыларын Абай күнімен құттықтады.
Л.Н.Гумилев атындағы Еуразия ұлттық университетінің басқарма мүшесі - әлеуметтік-мәдени даму жөніндегі проректоры, академик Дихан Қамзабекұлы, Семей қаласының Шәкәрім атындағы университеті «Абай және ұлттық руханият» ғылыми-зерттеу орталығының директоры, ф.ғ.д., профессор Арап Еспенбетов, Абай атындағы Қаз ҰПУ «Хәкім Абай» ғылыми-зерттеу орталығының директоры, ф.ғ.к. Жабал Шойынбет, Қ. Жұбанов атындағы Ақтөбе өңірлік университеті «Абайтану және ұлттық руханият» ғылыми- зерттеу орталығының директоры, ф.ғ.д., профессор Абат Пангерей, С.Аманжолов атындағы ШҚУ «Абайтану» ғылыми-зерттеу институтының директоры, ф.ғ.д., профессор Айжан Қартаева және Ә.Марғұлан атындағы Павлодар педагогикалық университетінің «Абай академиясы» институтының басшысы, ф.ғ.к. Әділбек Әміренов «Абай күніне» орай құттықтап, абайтанудағы өзекті мәселелерді сөз етті.