Бүгін жанкүйерлер көптен күткен Қазақстан Кубогының финалы өтті. Маусымның басты матчтарының бірінде ел батысының екі командасы, яғни «Ақтөбе» мен «Атырау» кездесті. Ойын Алматыдағы бейтарап стадионда ұйымдастырылды. Айта кетейік, онда соңғы рет мұндай титул 2016 жылы ойнатылған еді, деп хабарлайды El.kz ақпарат агенттігі.
Статистика және сандар
2024 жылғы Қазақстан Кубогының финалдық матчында Алматы орталық стадионында «Атырау» мен «Ақтөбе» кездесіп, тартысты ойында ақтөбеліктер 2:1 есебімен басым түсті,
Алматыдағы алаңға шыққан екі команданың бастапқы құрамдары келесідей болды:
«Атырау»: Хаткевич, Жагоров, Жұмаханов, Керімжанов, Степанов, Наджарян, Новак, Нойка, Стасевич, Сигневич, Каямба.
«Ақтөбе»: Шацкий, Ветэжелу, Қасым, Таңжарықов, Қайыров, Струм, Агбо, Думбия, Жан, Гондола, Ромеро.
Негізігі уақытта аяқталған есеп: «Атырау» - «Ақтөбе» 1:2 (1: 0)
Голдарды соққан: Сигневич 24 (1:0), пенальтиден Қасым 89 (1:1), Гондола 90 (1:2).
«Ақтөбе» клубын жеңісімен құттықтап, сәттілік тілеймін! Бүгін біз финалда алғаш рет батыс дербиіне куә болдық. Қос ұжым да жақсы ойынымен, жеңіске жігерлігімен қуантты. Осындай футбол мерекесін ұйымдастыруға атсалысқан серіктестерге және керемет қолдау көрсеткен жанкүйерлерге алғысымды білдіремін», - деді Qazaqstan Football League президенті Ғани Қайназаров.
Ойын барысы
Ақтөбеліктер ойын басталған сәтте бірден шабуылға көшті, бірақ аса қауіпті жағдай жасай алмады. Дегенмен атыраулықтар өздерінің жалғыз мүмкіндігін сәтті пайдаланды, Николай Сигневич баспен гол соғып кетті.
Сөйтіп жүргенде бірінші тайм да аяқталды, үзіліске «Атырау» командасы кішігірім басымдықпен кетті. Екінші таймда да «Ақтөбе» ойынды белсендірек бастады, жалпы ойын ашық өтіп жатты.
Осыдан кейін ойында 87-минутта даулы жағдай болып, матч төрешісі Егор Хаткевичтің қақпасына пенальти тағайындады. 11 метр жерден мүлт кетпеген Әлібек Қасым есепті теңестіріп кетті. Ал ойынның негізгі уақыты аяқталар сәтті ақтөбелік Фредди Гондола гол соғып кетіп, өз командасына 2:1 есебімен жеңіс әкелді.
Осылайша «Ақтөбе» ел Кубогын жеңіп алып, келесі еурокубок маусымында ел намысын қорғайтын болды.
Бұған дейін «Ақтөбе» 2008 жылы ғана аталмыш кубокты жеңген. Олар жарыс жолында «Жетісу», «Ордабасы», «Елімайды» жарыс жолынан шығарды. Енді осы жеңістің арқасында команда келесі маусымда еурокубоктың іріктеу кезеңіне қатысып, OLIMPBET QFL Қазақстан Суперкубогын сарапқа салады. Кубоктан бөлек, Игорь Леонов шәкірттері 65 миллион теңге иеленсе, «Атырау» 45 миллионов теңге сыйақы алды.