Алматылық оқушылар таулы жерде сынақтан өтті
![Алматылық оқушылар таулы жерде сынақтан өтті Алматылық оқушылар таулы жерде сынақтан өтті](/storage/storage/element/2024/07/26/mainphoto/114203/1200xauto_HVTelzxiT6fmTwK6zzOnA8CYLWCqzthcqbXzsh6t.jpg)
Таудағы «Жас сарбаз» лагерінде әскери-патриоттық клубтардың 75 тәрбиеленушісі тау туризмі мен альпинизм дағдыларын игеру мақсатымен оқудан өтті, деп хабарлайды El.kz ақпарат агенттігі.
«Жас сарбаз» лагері Алматы қаласының қорғаныс істері жөніндегі және Алматы облысының Шекара қызметі департаменттерінің бастамасымен құрылған.
Балалар Үлкен Алматы (3 680 метр), Турист (3 890 метр) және Сәтпаев шыңдарына (бұрынғы Кеңес шыңы) (4 317 метр) көтеріліп, еліміздің көк туын желбіретті. Сонымен бірге олар мемлекеттік шекараның периметрі бойынша жүріп өтіп, Үлкен Алматы көлі шатқалы мен Проходное шатқалына жорық жасады. Осылайша, Іле-Алатауы ұлттық паркінің географиясымен танысқан балалар қорықтың сұлулығына тәнті болды.
Лагерлік жиынға қатысушылар Фесенков атындағы обсерваторияға барып, ғарыштық байланыс торабының жұмысымен де танысты. Сонымен бірге балалар «Алма-Арасан» шекара заставасына экскурсия жасап, Шекара қызметі академиясының шатырлы лагерінде болды. Курсанттар кішкентай қонақтарға концерт ұйымдастырып, мерекелік дастархан жайды, - деді жасарбазшылардың жетекшісі Бақытжан Перімбетов.
Тренингтер мен басқа да іс-шараларды өткізуге Алматы қаласының қорғаныс істері жөніндегі департаменті мен «Живая Вселенная» жекеменшік мектебі көмектесті. Ал ҚР ҰҚК Алматы облысы бойынша Шекара қызметі департаменті, «Жас сарбаз» әскери-патриоттық клубы, № 95 жалпы білім беретін мектебі жиынның негізгі ұйымдастырушылары болды. Одан бөлек Астана, Қарағанды, Тараз қалаларынан да балалар мен ата-аналар комитетінің өкілдері келді.
Алдағы уақытта лагерь тағы 100-ден астам баланы қабылдап, 15 тамызда маусымды аяқтауды жоспарлап отыр.
![Telegram](https://el.kz/static/site/images/tel26.png)