Aitu қолданушыларының саны 1 миллионға жуықтады
Қазақстандық Aitu қосымшасы 2018 жылы іске қосылды. Бастапқыда ол Telegram мен WhatsApp үстемдік еткен нарықта қарапайым мессенджер ретінде пайда болды. Жарқын маркетингтік серпіліссіз, біртіндеп дамыған жоба кейін SuperApp форматына көшіп, бірнеше сервисті бір экожүйеге біріктіруге кіріскен еді.
Пандемия кезеңі Aitu-дың танымал болуына серпін берді. Қосымша COVID-19 бойынша ақпарат таратуда және Ashyq жүйесімен интеграция арқылы мәртебені тексеруде қолданылды. Қоғамдық орындарға кіргенде QR-код сканерлеу мүмкіндігі де осы платформа арқылы жүзеге асты. Пандемия аяқталғаннан кейін аудиторияның бір бөлігі кетуі мүмкін болғанымен, жоба экожүйесін кеңейтуге бет бұрды.
Кейінгі жылдары Aitu төлем жүйелерімен және eGov-пен интеграция жасады. Қазір платформада музыка сервисі, фильмдер мен сериалдар базасы, викториналар және шағын ойындар бар. 2025 жылдың тамызында қосымша мемлекеттік органдардың негізгі коммуникация құралы ретінде таңдалды. Қорғаныс министрлігі қызметтік хат алмасуды кезең-кезеңімен көшіру туралы хабарласа, Көлік министрлігі интеграция штаттық режимде жүріп жатқанын мәлімдеді. Сондай-ақ ТЖМ-нің 112 KZ арнасы іске қосылды.
Дегенмен, бұл көшу үдерісі мінсіз емес. Президент мемлекеттік қызметкерлердің отандық өнімге қызығушылығы бәсеңдегенін атап өтіп, 700 мың қолданушы туралы деректі тексеруді тапсырды.
Ал BTS Digital компаниясы ұсынған мәліметтер бұдан да жоғары көрсеткіштерді айтады. Компания дерегінше, 2025 жылдың соңында платформада ай сайын 900 мың белсенді қолданушы (MAU) тіркелген, ал күнделікті аудитория 190 мың адамға жетеді.
Біз білім беру платформаларынан бастап мемлекеттік сервистерге дейін кез келген ауқымдағы міндеттерге оңай бейімделетін икемді әрі қауіпсіз орта құрдық. Белсенді пайдаланушылар санының миллионға жуықтауы - ауқымдау стратегиямыздың нарықтан озық жұмыс істеп жатқанын көрсетеді, - деді Aitu әзірлеушісі BTS Digital компаниясының өкілдері.
2026 жылдың қаңтарында 2 миллионнан астам мәтіндік хабарлама жіберіліп, 180 мыңнан аса медиафайл алмасқан. Сондай-ақ 24 мыңнан астам аудиоқоңырау жасалып, 21 мың аудиохабарлама жолданған және 6 500-ден астам чат тобы құрылған. Хабарламаларға шамамен 150 мың реакция қойылған.
AI2U жасанды интеллект ассистенттері экожүйенің ең сұранысқа ие құралдарының біріне айналып келеді. Қазіргі таңда 18 бағыт қолжетімді. Қаңтар айында кеңес беруші ассистент, аудармашы және шет тілдерін үйрететін көмекшілер ең танымал болды. Сонымен қатар платформадағы арналар саны 42 мыңнан асты, бұл жергілікті контенттің өсіп келе жатқанын көрсетеді.
Экожүйе тек Aitu SuperApp-пен шектелмейді. Aitu цифрлық платформасы негізінде Telecom.kz («Қазақтелеком») жобасы және Platonus білім беру бағыты жұмыс істейді. Platonus ондаған мың студентті біріктірсе, Telecom.kz іске қосылған сәттен бері тұрақты өсім көрсетіп келеді.
2026 жылға арналған жоспарлар ауқымды: ірі нарық ойыншыларымен терең интеграция, мемлекеттік цифрлық платформалар мен байланыс операторларына арналған стратегиялық әріптестік модельдерін іске қосу көзделген. Компания өкілдері белсенді аудиторияның миллионға жуықтауы ауқымдау стратегиясының тиімділігін дәлелдейді деп санайды.
Бұл - цифрлық платформа. Мұнда музыка тыңдауға, қосымшалар жүктеуге, фильмдер көруге, ақпарат агенттіктеріне жазылуға болады. Сонымен қатар, қосымшада жасанды интеллект жұмыс істейді: ол пайдаланушының талғамына қарай музыканы іріктеп береді. Біз осы платформада хат алмасамыз, құжаттар мен жеке мәліметтерді жібереміз, ал мұндай ақпаратты өзге мемлекеттер өз мүддесіне пайдаланып кетуі мүмкін. Aitu - дербес деректерді, тіпті мемлекеттік маңызы бар құжаттарды қорғаудағы маңызды қадам, - деген болатын Мәжілістің бұрынғы депутаты Елнұр Бейсенбаев БАҚ өкілдеріне берген сұхбатында.
Алайда негізгі сұрақ ашық күйінде қалып отыр: жарияланған көрсеткіштер тұрақты әрі ұзақ мерзімді өсімнің белгісі ме, әлде мемлекеттік қолдауға сүйенген уақытша серпін бе? Aitu-дың болашағы қолданушылар сенімі мен нақты нарықтық бәсекеде қаншалықты орныға алатынына байланысты болмақ.
Қысқа да нұсқа. Жазылыңыз telegram - ға
Оқи отырыңыз 
