Адам құқықтары жөніндегі Ташкент декларациясы қабылданды
Ташкент декларациясы Өзбекстан, Қазақстан, Қырғызстан, Тәжікстан және Түркіменстанның адам құқықтарын қорғауға негізделген.
Орталық Азия елдері омбудсмендерінің адам құқықтары мен бостандықтарын қамтамасыз ету саласындағы ынтымақтастық алаңы болуға арналған бірінші форумы өтті, деп хабарлайды EL.KZ Адам құқықтары жөніндегі уәкілдікке сілтеме жасап.
Форум қорытындысы бойынша Адам құқықтары жөніндегі Ташкент декларациясы қабылданды.
Іс-шара БҰҰ өкілдігі, USAID миссиясы, ЕҚЫҰ жобаларының үйлестірушісі және халықаралық түрме реформасымен (PRI) ынтымақтастықта ұйымдастырылды. Форумды жыл сайын аймақ елдерінің бірінде өткізу жоспарлануда.
Форумға қатысушылар Орталық Азия елдерінің омбудсмендерінің өзара іс-қимылын, адам, оның ішінде әйелдер, балалар және мүгедек адамдардың құқықтарын қорғау, цифрлық технологияларды пайдалану, бас бостандығынан айыру орындарында ұсталатын адамдардың құқықтарын қамтамасыз ету саласындағы күш-жігер мен мүмкіндіктерді шоғырландыруды талқылады.
Ташкент декларациясы Өзбекстан, Қазақстан, Қырғызстан, Тәжікстан және Түркіменстанның адам құқықтарын қорғауға, оның ішінде аймақ азаматтарының адам құқықтары туралы құқықтық хабардарлығын арттыруға және азаптаудың алдын алу бойынша шаралар қабылдауға бейілділігін растайды.
Форум аясында өңір елдерінің омбудсмендері арасында екіжақты меморандумдарға қол қойылды.
2021 жылы Өзбекстан омбудсменінің кеңсесі 18,7 мыңнан астам өтініш алды, олардың 60-қа жуығы басқа елдерден жіберілді. 2022 жылдың бірінші жартыжылдығында шетелден жіберілген өтініштер саны 32-ді құрады. Бұл өтініштердің көпшілігі Орталық Азия елдерінен келіп түседі. Осыған байланысты өңір елдерінің омбудсмендері қызметінің бағыттарының бірі азаматтардың өтініштерін бірлесіп қарау.
Қысқа да нұсқа. Жазылыңыз telegram - ға