Қаңтар оқиғасы кезінде ұрланған 846 қару табылды
Бұл туралы ҚР Бас прокуратурасы Қылмыстық қудалау қызметі басшысының орынбасары мәлімдеді
Қаңтар оқиғалары кезеңінде ұрланған 846 қару табылды. Бұл туралы ҚР Бас прокуратурасы Қылмыстық қудалау қызметі басшысының орынбасары Елдос Қилымжанов мәлім етті, – деп хабарлайды El.kz порталы ҚазАқпаратқа сілтеме жасап.
– Ұрланған атыс қаруларын анықтау жұмыстары белсенді жүргізіліп жатыр. Шымкент қаласында Ұлттық қауіпсіздік комитеті органдары Ішкі істер министрлігімен бірлесіп, жедел-іздестіру іс-шараларын жүргізді. Осы орайда Түркістан облысының 2 тұрғыны ұсталды. Олардан «Камерад» аңшылық дүкенінен ұрланған екі «Сайга-12» карабині мен пневматикалық мылтық табылды, – деді Елдос Қилымжанов Орталық коммуникациялар қызметінде.
Сонымен қатар ол Таразда қару сақталған «қойма» табылғанын айтты. Одан Жамбыл облысы полиция департаментінен ұрланған 1 «Калашников» автоматы, 2 «Макаров» тапаншасы, «SHTURM» шабуыл мылтығы, 1 граната және оқ-дәрілер тәркіленді.
– Жалпы, ел бойынша құқық қорғау органдары қаңтар оқиғалары кезеңінде ұрланған 846 ойық және тегіс ұңғылы қаруды тапты. Ұрланған қарудың 2 мыңнан астамы әлі де қылмыскерлердің қолында екенін, бұл өз кезегінде қауіп төндіретінін атап өткен жөн. Осы ретте заңсыз сақталған қаруды, оқ-дәрілерді және жарылғыш заттарды өз еркімен тапсырған адамдар қылмыстық жауаптылықтан босатылады. Дегенмен, олардың әрекеттерінде өзге де қылмыс құрамы болмауы тиіс. Ал адамды құқық қорғау органдары қарумен ұстап алған жағдайлар ерікті түрде тапсыру деп танылмайды, – деді Бас прокуратура өкілі.
Бұдан бұрын хабарланғандай, қазіргі кезде арнайы прокурорлардың іс жүргізуінде жаппай тәртіпсіздіктер бойынша 53 және терроризм актілеріне қатысты 32 қылмыстық іс бар .
Мемлекеттік объектілерді өрттеу, мүліктерді жою және терроризм актілері Алматы, Шымкент қалаларында, Ақтөбе, Атырау, Алматы, Жамбыл, Қызылорда және Шығыс Қазақстан облыстарында жасалғаны белгілі болды.
Қысқа да нұсқа. Жазылыңыз telegram - ға