400 балаға арналған мектепте 800 бала оқиды

Мәжіліс төрағасының орынбасары Павел Казанцев, Мәжіліс депутаты Елдос Абақанов «AMANAT» партиясының өкілдерімен бірге Нұр-Сұлтан қаласындағы «Заречный» тұрғын алабының тұрғындарымен кездесті, деп хабарлайды EL.KZ.

Онда талқыланған басты мәселе – мектеп құрылысы туралы болды.

Елорданың қарқынды дамып келе жатқанына қарамастан, Заречный алабында әлі күнге дейін мектеп салынбаған. №45 орта мектептің салынғанына 34 жыл болған. Бүгінде 400 баланы ғана қамти алатын мектепте 800-ге жуық бала білім алуда. 

Кездесуде бірқатар қалалық, тіпті республикалық деңгейдегі мәселе көтерілді. Қалалық деңгейдегі проблема – ол құрылыс, көшелерді кеңейту, коммуникациялық мәселелер және т.б. Барлық мәселелерді жазып алдық, бақылауға аламыз», – деді Мәжіліс вице-спикері Павел Казанцев. 

Ең көп көтерілген сұрақ «мектеп қашан салынады?». Мектеп бұл ауданға, әрине, жеткіліксіз. Одан бөлек, мектепалды даярлық кластарын да жауып тастаған. Біздің мақсат – барлық проблеманы тікелей естіп, олардың шешу жолдарын ойластыру. Әр сұрақ бойынша жеке-жеке жұмыс жасайтын боламыз. Кездесу аясында айтылған және олардың шешу жолдары бақылауға алынатын болады, – деді Елдос Абақанов өз кезегінде.

Тұрғындар депутаттарға аудандағы салынып жатқан тұрғын үй кешендерінің саны мектеп пен балабақшаларға сай болуы керек деген пікірлерін айтты.

Қысқа да нұсқа. Жазылыңыз telegram - ға