2025 жылы саяхаттауға арналған ТОП-10 қосымша
Ақмарал Ағзамқызы El.kz тілшісі
Саяхат кезінде уақыт пен қаржыны үнемдеу, қажет ақпаратты дер кезінде алу – әрбір турист үшін маңызды. Осы мақсатта көмегін тигізетін ең тиімді 10 мобильді қосымшаны ұсынамыз. Бұл қосымшалардың барлығы тегін жүктеледі әрі қолдануға өте ыңғайлы, деп хабарлайды El.kz интернет порталы.
1. Google Maps
Саяхат кезінде ең басты қажеттіліктің бірі - қайда бара жатқаныңызды нақты білу. Google Maps - бұл жай ғана карта емес, толыққанды навигациялық көмекші. Жаяу жүрсеңіз де, көлікпен немесе автобус, метро сияқты қоғамдық көлікпен жүрсеңіз де, сізге ең қысқа әрі ыңғайлы маршрутты дәл есептеп береді.
Қосымша нақты уақыттағы жол қозғалысын, кептелістерді, жөндеу жұмыстары мен апаттар жайлы мәліметтерді ескеріп, ең тиімді бағытты ұсынады. Сонымен қатар, жақын маңдағы дәмхана, дәріхана, банкомат, жанармай бекеті секілді нысандарды тез табуға мүмкіндік береді.
Егер интернет жоқ жерде жүрсеңіз, қажетті аймақтың картасын алдын ала жүктеп алып, оффлайн режимде де қолдануға болады.
Артықшылықтары:
– Кез келген көлік түріне арналған нақты бағыттар
– Жолдағы жағдайды ескеріп, маршрутты автоматты түрде түзету
– Картаны оффлайн қолдану мүмкіндігі
– Қоғамдық көліктің кестесі мен аялдамаларын көрсету
– Жақын маңдағы орындарды іздеу (мейрамхана, дәріхана, банк т.б.)
Кемшіліктері:
– Онлайн режимде көп интернет трафигін қолдануы мүмкін
– Кейбір елдер мен қалаларда ақпарат толық емес немесе жаңармаған
Қай қалада болсаңыз да, қай тілде сөйлесе де, Google Maps сіздің жолсерігіңіз болады. Сапарда адаспай, уақытыңыз бен күшіңізді үнемдегіңіз келсе - бұл қосымша смартфоныңызда міндетті түрде болуы керек.
2. Airbnb
Қонақүйдің стандартты бөлмелерінен шаршадыңыз ба? Онда Airbnb - сіз іздеген балама. Бұл қосымша арқылы үй, пәтер, коттедж, бунгало, тіпті мұнара немесе шағын сарай сынды ерекше орындарды жалдап тұруға болады. Әлемнің кез келген нүктесінде жергілікті тұрғындардың ұсынатын тұрғын үйлері арқылы саяхатқа мүлде басқа дәм қосасыз.
Airbnb-дің басты артықшылығы - иесімен тікелей байланыс жасау мүмкіндігі. Қосымша арқылы үй иесіне сұрақ қойып, тұру шарттарын нақтылап, арнайы ұсыныстар алуға болады. Сондай-ақ, әрбір нысанға басқа саяхатшылар қалдырған пікірлер мен бағалар негізінде сенімді таңдау жасауға болады.
Артықшылықтары:
– Ерекше және жайлы тұрғын үйлердің үлкен таңдауы
– Бағалар әр түрлі бюджетке лайық
– Иесімен тікелей хат алмасу мүмкіндігі
– Басқа қолданушылардың шынайы пікірлері мен бағалары
– Жергілікті мәдениетпен жақынырақ танысу мүмкіндігі
Кемшіліктері:
– Кей жағдайларда иесі брондауды соңғы сәтте болдырмауы мүмкін
– Қонақүйге қарағанда кейбір қызметтер (таңғы ас, тазалау) қосымша төленеді
Airbnb - жай ғана түнеу орны емес, бұл - басқа елдің атмосферасын шынайы сезінудің, жергілікті тұрғындардай өмір сүрудің мүмкіндігі. Шынайы әсер мен жайлы саяхат іздесеңіз, Airbnb - дәл сізге арналған.
3. TripAdvisor
Жаңа қалада дәмді мейрамхана, жайлы қонақүй немесе көруге тұрарлық тарихи орын іздеп жүрсіз бе? Ондайда TripAdvisor - сіздің нағыз сенімді серігіңіз. Бұл қосымша бүкіл әлем бойынша саяхатшылардың пікірлері мен бағаларына негізделіп жасалған, яғни шынайы тәжірибеге сүйенген кеңестерді бір жерден табуға мүмкіндік береді.
Мұнда қонақүйлер, мейрамханалар, мұражайлар, көрнекті орындар, жергілікті турлар мен экскурсиялар туралы миллиондаған пікір мен фотосуреттер жиналған. Қайда бару керек, не көру керек, қай жерден аулақ жүрген дұрыс - бәрі нақты қолданушылардың тәжірибесіне сүйене отырып жазылады.
TripAdvisor арқылы таңдаулы нысандарды тізімге сақтап қоюға, бағыт құрастыруға және жоспармен бөлісуге болады. Бұл әсіресе сапар алдында дайындық жасау үшін өте тиімді құрал.
Артықшылықтары:
– Жүздеген елдегі миллиондаған пікір мен рейтинг
– Пайдаланушылар түсірген нақты фотолар
– Өз бағытыңызды жасап, сақтап қою мүмкіндігі
– Жергілікті турлар мен іс-шаралар ұсынылады
– Интерфейс ыңғайлы, қолдануға жеңіл
Кемшіліктері:
– Кей пікірлер субъективті немесе жалған болуы мүмкін
– Барлық бағалар әрқашан өзекті емес.
4. Skyscanner
Саяхат шығындарының басым бөлігі - ұшақ билеті мен қонақүй ақысы. Ал Skyscanner - осы екі маңызды шығынды үнемдеуге көмектесетін әмбебап іздеу жүйесі. Қосымша жүздеген әуекомпаниялар мен қонақүйлердің бағаларын салыстырып, ең тиімді нұсқаларды ұсынады.
Skyscanner арқылы тек бір бағытты емес, бірнеше маршрутты қатар іздеуге болады. Сондай-ақ күнтізбелік баға көрсеткіші арқылы қай күні ұшу арзан болатынын бірден көресіз. Ал билет бағасы түскен жағдайда сізге бірден хабарлама келеді - бұл функция үнемдеуді қалайтындар үшін таптырмас мүмкіндік.
Қосымшаның тағы бір ыңғайлы тұсы - тек рейстерді емес, қонақүйлер мен көлік жалдау қызметтерін де бір жерден іздеуге болады.
Артықшылықтары:
– Әуебилеттер, қонақүйлер және автокөлік жалдау қызметтері - барлығы бір платформада
– Бағалар түскені туралы ескерту жүйесі
– Күніне қарай баға өзгерісін бақылау мүмкіндігі
– Интуитивті интерфейс, қолдануға өте жеңіл
– Қолжетімді бағалар мен балама маршруттар ұсынады
Кемшіліктері:
– Кей жағдайларда нақты брондау үшін басқа сайтқа өтесіз
– Барлық әуекомпаниялар бірдей ұсынылмауы мүмкін
Skyscanner - саяхатыңызды жоспарлауда алғашқы ашатын қосымшаңыз болуы тиіс. Уақыт пен ақшаны үнемдегіңіз келсе, осы платформаны қолдану - ең дұрыс шешімдердің бірі.
5. Wi-Fi Map
Сапар барысында интернетке қосылу - қазіргі заманның ең маңызды қажеттіліктерінің бірі. Бірақ роумингке ақша шашқыңыз келмесе немесе жергілікті SIM-карта сатып алуға уақыт болмаса, Wi-Fi Map қосымшасы көмекке келеді.
Бұл қосымша жақын маңдағы Wi-Fi желілерін картадан көрсетіп қана қоймай, сол желілердің атауы, сигналының қуаты, жылдамдығы және, ең бастысы - құпиясөзі (password) туралы ақпарат береді. Бұл мәліметтерді бүкіл әлем бойынша миллиондаған қолданушылар енгізіп, жаңартып отырады, яғни база үнемі толықтырылып тұрады.
Wi-Fi Map арқылы сіз карта аймағын алдын ала жүктеп алып, оффлайн режимде де қолдана аласыз. Бұл әсіресе шетелде жүргенде, интернетсіз қалып қойғанда өте пайдалы.
Артықшылықтары:
– Миллиондаған Wi-Fi нүктесі мен олардың құпиясөздері
– Офлайн карта жүктеу мүмкіндігі
– Қолданушылар енгізген нақты пікірлер мен бағалар
– Қосымшада желі жылдамдығы да көрсетіледі
– Интерфейс қарапайым, кез келген адам оңай түсінеді
Кемшіліктері:
– Кей желілер ескі немесе жарамсыз болуы мүмкін
– Құпиясөздер 100% дәл болмауы ықтимал
– Кейбір мүмкіндіктер ақылы нұсқада ашылады
Интернетсіз қалғыңыз келмесе, Wi-Fi Map - міндетті түрде жүктеп алатын қосымша. Әсіресе Google Maps, аудармашы немесе мессенджерлерді жиі қолданатындар үшін бұл құрал шетелде нағыз құтқарушыға айналады.
6. Rome2Rio
Сапар барысында "Бұл жерге қалай жетем?" деген сұрақ жиі туындайды. Әсіресе, басқа елге барып, бір қаладан екінші қалаға немесе туристік нысанға жету керек болса - Rome2Rio сіздің ең сенімді көмекшіңізге айналады.
Бұл қосымша арқылы кез келген екі нүктенің арасындағы барлық мүмкін маршруттарды көре аласыз. Ұшақ, пойыз, автобус, метро, паром, көлік жалдау - барлық нұсқаны салыстырып, жол ұзақтығын, шамамен қанша қаражат кететінін және қай көлік түрі тиімді екенін нақты көрсетеді.
Rome2Rio жергілікті және халықаралық маршруттарды қамтиды. Мысалы, Астанадан Сиднейге дейінгі бағытты жоспарласаңыз, қосымша сізге әуежайға қалай жетуді, қай рейспен ұшуға болатынын, әрі қарай қандай пойыз немесе автобуспен жүруге болатынын кезең-кезеңімен көрсетеді.
Артықшылықтары:
– Барлық көлік түрлері мен бағыттарды бір жерден көру
– Уақыт пен шығынды алдын ала бағалау
– Жолдың нақты сызбасын көрсету
– Интерфейсі өте қарапайым және түсінікті
– Әлемнің кез келген нүктесіне арналған маршруттар базасы
Кемшіліктері:
– Кейде ақпарат ескірген немесе нақты емес болуы мүмкін
– Онлайн брондау мүмкіндігі барлық елдерде бола бермейді
Егер сіз шетелде жергілікті тұрғын сияқты емін-еркін қозғалғыңыз келсе - Rome2Rio дәл сол үшін жасалған. Алдын ала маршрутты жоспарлап, уақыт пен ақшаны үнемдеңіз.
7. Duolingo
Кез келген елге сапар шексеңіз, жергілікті тілде бірнеше сөз білу - сіздің құрметіңізді ғана емес, қауіпсіздігіңіз бен жайлылығыңызды да қамтамасыз етеді. Duolingo - дәл осындай жағдайда көмекке келетін, әлемдегі ең танымал әрі тегін тіл үйрену қосымшаларының бірі.
Duolingo арқылы 40-тан астам тілді меңгеруге болады, оның ішінде ағылшын, испан, француз, неміс, итальян, корей, жапон және т.б. бар. Қосымша ойын форматына құрылған: сізге тапсырмалар беріледі, дұрыс жауап берсеңіз ұпай жинайсыз, қатарынан күнде жаттығып отырсаңыз, «сериал» үзбейсіз. Бұл тәсіл ынтаңызды жоғалтпай, күн сайын тіл үйренуге қызықтырады.
Сабақтар қысқа, жеңіл және нақты өмірде қолдануға болатын сөздер мен сөйлемдерге негізделген. Саяхат кезінде керек болатын базалық фразалар, амандасу, бағыт сұрау, тапсырыс беру сияқты қарапайым коммуникацияны осы жерден үйрене аласыз.
Артықшылықтары:
– Қысқа әрі тиімді сабақтар
– Көптеген тілдер қолжетімді
– Ойын түріндегі формат (мотивация сақталады)
– Тегін қолдануға болады
– Саяхатқа дейінгі экспресс-дайындыққа өте ыңғайлы
Кемшіліктері:
– Терең грамматикалық білім бермейді
– Тілді толық меңгеруге емес, базалық деңгейге бағытталған
Егер барған елдің тілінде екі-үш сөз айтып, жергілікті тұрғынмен күліп сөйлескіңіз келсе - Duolingo көмектеседі. Жолға шықпас бұрын жүктеп алыңыз, ал ұшақта, пойызда немесе кезекте тұрған сәттерде бірнеше минут бөліп, жаңа тілдің алғашқы қадамдарын жасап көріңіз.
8. XE Currency
Саяхат кезінде әр елдің валютасына бейімделу - маңызды әрі кейде күрделі мәселе. Бағам қалай өзгеріп жатыр? Сауда жасағанда немесе ақша айырбастағанда ұтылып қалмау үшін нақты курсты білу қажет. Осындайда XE Currency қосымшасы көмектеседі.
Бұл - әлемдегі ең танымал әрі сенімді валюта конвертерлерінің бірі. Қосымша нақты уақыттағы бағамдарды көрсетіп қана қоймай, интернет жоқ кезде де жұмыс істей алады. Ол үшін керек валюталарды алдын ала жүктеп қойсаңыз жеткілікті.
XE Currency арқылы 180-нен астам валютаның арасындағы айырбасты жылдам есептеуге болады. Жеке валюта тізімін жасап, сіз үшін маңызды валюталардың бағамын күн сайын бақылауға мүмкіндік бар.
Артықшылықтары:
– Соңғы өзгерістер нақты уақытта жаңарып отырады
– Интернетсіз де жұмыс істейді (оффлайн режим)
– Валюта тарихын көруге болады (графиктер мен динамика)
– Валюталар тізімін өзіңізге бейімдей аласыз
– Интерфейсі қарапайым, кез келген қолданушыға түсінікті
Кемшіліктері:
– Кей айырбастау бағамдары нақты айырбастау пункттеріндегі бағамен сәйкес болмауы мүмкін
– Жиі қолданғанда жарнама шығуы мүмкін
9. Trail Wallet
Саяхатта жүріп, қанша ақша жұмсағаныңызды нақты білгіңіз келсе, Trail Wallet - таптырмас көмекші. Бұл қосымша барлық шығындарыңызды күнімен, категориясымен бөліп есептеп отырады. Яғни жолақы, тамақ, баспана, ойын-сауық сияқты бағыттар бойынша шығындарды жеке-жеке бақылауға мүмкіндік береді.
Интерфейсі өте қарапайым әрі түсінікті. Әр елде басқа валюта қолданылса да, айырбастау бағамын автоматты түрде есептеп, бәрін өзіңізге ыңғайлы валютада көрсетеді. Күніне қанша ақша жұмсадыңыз, қай салаға артық кеткеніңіз - барлығы көз алдыңызда.
Артықшылықтары:
– Шығындарды категория бойынша бөлу
– Көпвалюталық қолдау (автоматты айырбастау)
– Күнделікті бюджет белгілеп, соған сай бақылау
– Интерфейс қарапайым, қолдануға оңай
– Ұзақ сапарлар мен рюкзакпен саяхаттауға өте тиімді
Кемшілігі:
– Барлық шығынды қолмен енгізу керек
– Кейбір мүмкіндіктер тек ақылы нұсқада
Trail Wallet - бюджет шеңберінен шықпай, әр тиынды орнымен жұмсауға көмектесетін қарапайым, бірақ өте пайдалы құрал. Ұзақ сапарға шықсаңыз, әсіресе бірнеше елге барсаңыз - бұл қосымшаны алдын ала жүктеп алыңыз.
10. Google Translate
Google Translate - саяхат кезінде тіл білмеу мәселесін оңай шешетін ең ыңғайлы қосымшалардың бірі. Қалаған мәтінді теріп те, дауыстап айтып та аударуға болады. Ең басты ерекшелігі - камера арқылы аударма жасау мүмкіндігі: мәзір, жол белгілері, жарнама секілді жазуларды бірден қазақшаға аударады. Шетелде өзіңізді сенімді сезінгіңіз келсе, бұл қосымша смартфоныңызда міндетті түрде болуы керек.
Сонымен қатар, оффлайн режимге арналған тіл пакеттерін жүктеп алсаңыз, интернетсіз де қолдана аласыз. Қосымша шетелде жүргенде жол сұрау, шопинг жасау немесе жай ғана қарым-қатынас орнату кезінде үлкен көмек болады.
Артықшылықтары:
– Камерамен нақты уақытта аудару
– Дауысты аударма (екі адам сөйлесе алады)
– Қолмен жазылған мәтінді таниды
– Интернетсіз жұмыс істейді
– Басқа қосымшалардағы мәтінді де аудара алады
Кемшілігі:
– Кейде мәнін дұрыс жеткізбейді
– Ұзақ диалогқа жарамауы мүмкін
Саяхат – тек қана билет пен чемодан емес, бұл – дайындық пен цифрлы көмекшілер арқылы жеңіл әрі тиімді өтетін шытырман тәжірибе. Осы қосымшалар сіздің жолсерігіңізге айналсын!
Қысқа да нұсқа. Жазылыңыз telegram - ға
Оқи отырыңыз 
