2025 жыл Жамбыл облысында "Кітап оқу жылы" болып жарияланды
Жамбыл облысында 2025 жыл "Кітап оқу жылы" деп белгіленді, деп хабарлайды El.kz ақпарат агенттігі.
Бұл туралы облыс әкімі Ербол Қарашөкеев мәлімдеді.
Кітап – рухани азық, жанымыздың шуағы, болашағымыздың бағдары. Биылғы 2025 жылды Жамбыл облысында "Кітап оқу жылы" деп белгілеу – осы құндылықтарды жаңғыртуға бағытталған қадам, – деген аймақ басшысы жаңа жылдық демалыста Шерхан Мұртазаның "Ай мен Айша" романын және Күләш Ахметованың "Құт" атты өлеңдер жинағын қайта оқып шыққанын жазды:
"Ай мен Айша" – адамның жүрегіне әсер етіп, ананың махаббаты мен қайсарлығын терең сезінуге шақыратын терең философиялық туынды. Күләш Ахметованың "Құт" жинағы болса, өлеңнің қасиетін, сөздің құдіретін сезіндірді.
Әулиеата өңірі – ақын-жазушылардың мекені, сөз өнерінің төрі. Ендеше, баршаңызды "Әулиеата – кітап оқитын өңір" жобасы аясында кітап оқуға шақырамын! Уақыт бөліңіз, кітап оқыңыз, рухани байыңыз! Адамзаттың алыбы Абай: "Артық білім кітапта, Ерінбей оқып көруге..." деп, кітаптың құндылығын ерекше атап көрсеткен. Ендеше, біз де білім мен руханияттың кілтін кітаптан табайық, – деді Ербол Қарашөкеев.
Қысқа да нұсқа. Жазылыңыз telegram - ға