180 млн теңге шығын: «Chia TaiPharmaceutical» қаржы пирамидасының тағы мүшесі сотталды
БҚО-да мемлекеттік айыптаушы «Chia TaiPharmaceutical» қаржылық пирамидасы ұйымдастырушының кінәсін дәлелдеді, деп хабарлайды El.kz ақпарат агенттігі.
Облыстық прокуратура мәліметінше, 2022 жылдың қыркүйегінен 2023 жылдың сәуір айына дейін Батыс Қазақстан облысы Шыңғырлау ауданының тұрғыны «Chia Tai Pharmaceutical» қаржы пирамидасына қосылып, оның құрылымдық бөлімшесінде жетекші орынға ие болды. Ол осы уақыт аралығында тұрғындардан 180 млн теңге алған.
Фармацевтикалық зауытқа заңды инвестиция саламыз деген жалған атаумен ол фармацевтикалық кәсіпорын қызметінен жоғары кіріс алуға уәде беріп, салымшылардан заңсыз қаражат тартқан. Оның қылмыстық әрекетінің нәтижесінде 185 жәбірленушіге жалпы сомасы 180 миллион теңгеден астам материалдық шығын келтірілген. Бөрлі аудандық прокуратурасының мемлекеттік айыптаушысының принципті ұстанымын ескере отырып, сотталушының қаржылық пирамиданы құру және басқару, сондай-ақ қылмыстық жолмен алынған ақша мен басқа да мүлікті заңдастыру бойынша кінәсі толық дәлелденді, - делінген мәліметте.
Сот мемлекеттік айыптаушының ұстанымымен келісе отырып, сотталушыны Қылмыстық кодекстің 217-бабының 2-бөлігі 2-тармағы (Қаржылық (инвестициялық) пирамиданы құру және басқару), 218-баптың 2-бөлігі 3-тармағында (Қылмыстық жолмен алынған ақшаны және (немесе) өзге мүлікті заңдастыру (жылыстату) көзделген қылмыстарды жасағаны үшін кінәлі деп тауып,қылмыстық құқық бұзушылықтың жиынтығымен 5 жыл мерзімге қаржы ұйымдарында басшы лауазымдарды атқару және қаржы ұйымының қатысушысы болу құқығынан айыра отырып 5 жылға бас бостандығынан айыру түріндегі жаза тағайындады.
180 миллион теңгеден астам келтірілген шығын жәбірленушілердің пайдасына толығымен өндірілді.
Қысқа да нұсқа. Жазылыңыз telegram - ға