18 миллион турист: Париж әлемнің басты бағытына айналды
Euromonitor International ұйымы жариялаған Top 100 City Destinations Index 2025 жыл сайынғы индексінде Париж әлемдегі ең үздік туристік бағыт аталды, деп хабарлайды El.kz интернет порталы.
2025 жылы қалаға 18 миллионнан астам шетелдік турист келген. Бұған Париждің дамыған туристік инфрақұрылымы, бай мәдени ортасы және тұрақты даму қағидаттарына бағытталған саясаты үлкен ықпал етті. Сондай-ақ басты назар аудартқан оқиғалардың бірі — ұзақ реконструкциядан кейін қайта ашылған Қасиетті Париж Құдай Анасы Соборы. Бұл әлем саяхатшыларының қызығушылығын айтарлықтай күшейткен.
Үздік бестікке төрт еуропалық қала енді
Өткен жылдағыдай, рейтингтің алғашқы бестігі өзгеріссіз қалды. Еуропа өз позициясын сақтап, үздік бес орынның төртеуін иеленді.
-
2-орын – Мадрид. Қала тұрақты даму жобалары мен көлік жүйесін жаңғырту бастамалары арқылы жоғары баға алды.
-
3-орын – Токио. Ең үздік азиялық туристік бағыт мәртебесін сақтап қалды. Қалаға туристерді бай мәдени бағдарламалар мен ірі спорттық шаралар тартады.
-
4-орын – Рим. Жоғары санатты қонақүйлердің ашылуы және әуежай инфрақұрылымының кеңеюі оның позициясын күшейтті.
-
5-орын – Милан. Мода мен дизайн саласындағы көшбасшылық, іскерлік ортаның белсенділігі және жетілген туристік инфрақұрылым Миланды үздік бестікке енгізді.
2025 жылы халықаралық саяхат көлемі өсім көрсетуді жалғастырды. Ең жоғары көрсеткіш Азиаттық-Тынық мұхит аймағында тіркелді — плюс 10%. Таяу Шығыс пен Африка өңірлері 7% өсім көрсетті.
Шетелдік туристер саны бойынша Бангкок абсолютті лидер атанды — 30,3 млн адам. Одан кейін Гонконг, Лондон және Макао орналасқан.
Туристік ағынның артуына визалық талаптарды жеңілдету, ірі инфрақұрылымдық жобалар, сондай-ақ кең көлемді мәдени және спорттық шаралар ықпал етті. Бұл бағыттар көлік қолжетімділігін жақсартып, сапар сапасын арттырған.
Қысқа да нұсқа. Жазылыңыз telegram - ға
Оқи отырыңыз 
