1 сәуірден бастап коммуналдық қызмет тарифтерін көтеруге рұқсат беріледі
1 сәуірден бастап Қазақстанда коммуналдық қызмет көрсетушілерге тарифтерді көтеруге заңды негіз пайда болады. 2025 жылдың қазан айынан бері күшінде болған мораторий аяқталады, деп жазады El.kz.
Тарифтердің қалай, қай өңірлерде және қаншалықты өсетіні Табиғи монополияларды реттеу комитеті алаңында өткен дөңгелек үстелде талқыланды.
Мораторийдің аяқталуы нені білдіреді
Енді қызмет көрсетушілер су, жарық, жылу және басқа да коммуналдық қызметтердің тарифтерін көтере алады.
Билік өкілдері тариф өсімі біртіндеп жүзеге асатынын, күрт қымбаттау болмайтынын айтып отыр.
Коммуналдық қызметтерге мыналар кіреді:
- жылумен қамту (ыстық су, жылыту)
- электр энергиясы
- суық сумен қамту
- кәріз жүйесі
- газбен қамту
- қоқыс шығару
- лифт қызметі
Баға қашан көтеріледі
1 сәуірден бастап барлық тариф бірден өспейді.
Алдымен компаниялар табиғи монополиялар департаменттеріне өтінім беруі тиіс, ал оны қарау белгілі бір уақыт алады.
Комитеттің мәліметінше, алғашқы өтінімдер сәуір айында түсе бастайды. Ал тарифтердің алғашқы өзгерістерін маусым айына қарай байқауға болады.
Егер жеткізушілер “Тарифті инвестицияға айырбастау” бағдарламасы арқылы жедел өтінім берсе, қарау мерзімі 40 күнді құрайды. Қалыпты тәртіпте бұл процесс 90 күнге дейін созылады.
Қай өңірлерде алдымен қымбаттайды
Ең алдымен инфрақұрылымы тозған аймақтарда тариф өсуі мүмкін. Яғни:
- желілері ескірген
- апат жиі болатын
- жабдықтары жаңартуды қажет ететін өңірлер
Мұндай аймақтарға Солтүстік, Шығыс және Батыс Қазақстан өңірлері, сондай-ақ Ақмола облысы кіруі ықтимал.
Тариф қаншалықты өседі
Қазіргі таңда нақты пайыздық көрсеткіштер жоқ. Дегенмен шектеу бар: тариф өсімі инфляция деңгейінен аспауы тиіс.
Биыл инфляция 9–12% шамасында болады деп болжануда.
Тағы қандай өзгерістер күтіледі
Қазір “байланысты тариф қалыптастыру” жүйесін енгізу мәселесі қарастырылып жатыр. Оның мәні – бір қызмет түрінің қымбаттауы басқа тарифтерге де тікелей әсер етеді.
Мысалы, электр энергиясы қымбаттаса, бұл су мен жылу тарифтерінің өсуіне де ықпал етуі мүмкін.
Қорытындылай келе, тарифтердің өсуі бірден емес, кезең-кезеңімен жүреді. Дегенмен алдағы айларда коммуналдық қызмет құнының біртіндеп артатыны анық.
Оқи отырыңыз 
