Пайдалы таңғы ас: 7 мінсіз мәзір

Таңғы асты түрлендіргіңіз келе ме?

Сәтті күн таңғы астан басталады. Денсаулыққа пайдалы әрі сіңіміді таңғы ас – бүкіл күніңіздің жақсы әрі сергек өтетініне кепілдік бола алады. Сол себепті дәмді әрі пайдалы ас пісірген дұрыс. Егер күнде жұмыртқа мен ботқа жеуден жалықсаңыз, El.kz интернет жобасы ұсынған 7 түрлі мінсіз таңғы астың түрлерімен таныс болыңыз.

Сұлы жармасы құймағы

Ол үшін:

  • 1 жұмыртқа және 1 жұмыртқаның ақуызы
  • 3 ас қасық сұлы жармасы
  • 3 ас қасық сүт
  • Какао (қалауыңыз бойынша)

Әзірлеу әдісі:

  1. Барлық ингредиенттерді мұқият араластырып, табаға құямыз (табаға бір тамшы күнбағыс майын жақсаңыз болады). Табаның қақпағын жауып, құймақтың түсі қоңырқай тартқанға дейін күтеміз. Келесі бетіне аударып, тағы күтеміз.
  2. Сұлы жармасы құймағына қалауыңызша ірімшік, жеміс-жидек, тосап, қаймақ қосып ұсынуыңызға болады.

Ірімшік пен алма қосылған бәліш

Ол үшін:

  • 100 гр ірімшік
  • 1 жұмыртқа
  • 1\2 алма
  • 1 шәй қасық мак

Әзірлеу әдісі:

  1. Алдымен ірімшікті жұмыртқамен араластырамыз. Оған туралған алма мен бал қосамыз.
  2. 200 °С температураға қойылған пешке 15-20 минут пісіреміз.
  3. Тағамды ұсынбас бұрын, сәл салқындатып алған дұрыс.

Кәді қосылған құймақ

 

Ол үшін:

  • 250 гр кәді
  • 2 жұмыртқа
  • 30 гр кебек немесе жасунық
  • Тұз бен бұрыш қалауыңызша
  • Жұмсақ ірімшік
  • Йогурт

Әзірлеу әдісі:

  1. Кәдіні үккішке үгеміз. Жұмыртқа қосып, үстіне кебек себеміз. Жақсылап араластырып, тұз бен бұрыш қосамыз.
  2. Келесі кезекте табаға құйып, екі жағын кезек-кезек аударып, пісіреміз.
  3. Құймаққа керекті соусты әзірлеу үшін, жұмсақ ірімшікке йогурт қосып,  қаймақ тәріздес күйге енгенше араластырамыз.
  4. Кәді қосылған құймақтың үстіне соус салып, ыстық күйінде ұсынамыз.

Тәтті орама

Ол үшін:

  • 100 г суға піскен күріш
  • 1 жұмыртқа және 2 жұмыртқаның ақуызы
  • 80 гр жұмсақ ірімшік
  • Жеміс-жидек (құлпынай, шие, банан т.б.)

Әзірлеу әдісі:

  1. Піскен күріш пен ақуызды араластырып, табаға пісіреміз. (табаға күнбағыс майын жақпағаныңыз абзал).
  2. Ірімшік пен жидектерді араластырамыз.
  3. Орамаға жидекті жағып, әдемілеп ораймыз.

Сұлы жармасы қосылған алма

Ол үшін:

  • Жұмсақ ірімшік
  • Корица қалауыңызша
  • Жұпар жүзімі (мускат жаңғағы) қалауыңызша
  • Бір шымшым мак
  • Грек жаңғағы
  • 1 ас қасық сұлы жармасы
  • Аздаған бал

Әзірлеу әдісі:

  1. Үлкен қызыл алманы таңдаймыз (үлкені дұрыс). Ұқыппен ортасын тазалаймыз.
  2. Алманың ішіне 1 ас қасық ірімшік, сұлы жармасы, үгітілген грек жаңғағын салып, бетіне мак пен корицаны себеміз.
  3. Пешке алма жұмсарғанша 15 минуттай пісіреміз.
  4. Дайын асты салқын сондай-ақ ыстық күйінде де жеуге болады.

Сұлы жармасы қосылған құймақ (панкейк)

Ол үшін:

  • 50 г сұлы жармасы
  • 2 жұмыртқа
  • 15 г мейіз
  • Бірнеше тамшы бал
  • 50 г майсыз ірімшік

Әзірлеу әдісі:

  1. Барлық ингредиенттерді араластырамыз.
  2. Екі жағын аударып, пісіреміз.
  3. Құймақты ыстық күйінде ұсынамыз. Қалауыңызша майлылығы 5% ірімшік қосуға да болады.

Құтыдағы сұлы жармасы

Ол үшін:

  • 1\2 стақан сұлы жармасы
  • Жұмсақ ірімшік
  • Йогурт
  • 1 банан
  • Жидек қалауыңызға ақарай
  • Бір шымшым какао немесе корица
  • 1 шәй қасық бал

Әзірлеу әдісі:

  1. Шыны банкаға немесе құтыға алма кезек сұлы жармасы, 2 ас қасық йогурт, кесілген бананды сатылап орналастырамыз. Бетіне жидек салып, үстіне какао немесе корицаны себеміз.
  2. Қақпағын жабамыз. Жақсылап араластырамыз. Түні бойы тоңазытқышта қалдырамыз. 

Астарыңыз дәмді болсын!

Пікір

comments powered by HyperComments

Ұқсас материалдар

Әріптестер